Bestu þakkir til allra þeirra tannlækna, tanntækna og tannfræðinga sem hjálpuðust að á hjálparvaktinni 9. maí. Þurftum að loka eftir klukkutíma þá var 61 barn komið á skrá. Við buðum til okkar nokkuð mörgum til að skoða ástandið og ræða við okkur og Bragi Guðbrandsson forstjóri Barnaverndarstofu mætti sem og Ásta Ragnheiður Jóhannesdóttir (fyrrverandi félagsmálaráðherra) og Lára Björnsdóttir formaður Velferðarvaktarinnar. Svona heimsóknir þar sem fólk sér það svart á hvítu hvernig ástandið er er mun áhrifaríkara en allar heimsins skýrslur. Morgunblaðið sendi sitt fólk og fékk þetta framtak okkar heila síðu í Mogganum. Nú er boltinn hjá ráðamönnum þjóðarinnar.

Síðasta Hjálparvaktin verður svo 23. maí.

Ingibjörg S. Benediktsdóttir

»ÞAÐ getur enginn heilbrigðisráðherra orðið vitni að þessari reynslu sem við urðum fyrir um síðustu helgi [í Tanngarði, húsakynnum tannlæknadeildar Háskóla Íslands], án þess að gera eitthvað,« segir Ögmundur Jónsson heilbrigðisráðherra. Áfall hafi verið að sjá hve aðsóknin og þörf þeirra sem leituðu í ókeypis aðstoð Tannlæknafélags Íslands fyrir börn og unglinga hafi verið mikil. Eftir klukkutíma voru 60 börn komin á skrá og ljóst að ekki yrði fleirum sinnt þann daginn. Skemmdir hjá sumum reyndust þá meiri en tannlækna hafði órað fyrir. »Það er alveg augljóst að ríkið verður að endurskoða aðkomu sína að þessum málum og verður að koma á miklu virkari hátt inn í tannheilsu barna og unglinga,« segir Ögmundur og kveður óheillaspor er farið var með tannlækningar út úr skólum á sínum tíma. »Það er þó ekki formið sem skiptir öllu, heldur að eftirlitinu og tannhirðunni sé fylgt eftir. Ég mun gera ráðstafanir til þess að það fari fram rannsókn og settar verði fram tillögur um hvernig þessi mál verði færð til betri vegar á eins markvissan og skjótvirkan hátt og unnt er.« Hafi hann fullan hug á að fá skýrslu um úrbætur afhenta á næstu vikum, gegni hann áfram embætti heilbrigðisráðherra.

Spurður hvort ókeypis tannlækningar fyrir börn og unglinga geti orðið að veruleika, segir hann það vissulega vera Vinstri hreyfingunni - grænu framboði keppikefli og svo verði áfram. annaei@mbl.is

Úr fréttatíma sjónvarps laugardaginn 18. apríl

Ekki gafst mikill tími til að mynda. En hér er hluti hópsins sem vann þetta góða sjálfboðaliðsstarf í dag. Við þökkum þeim öllum kærlega fyrir frábæra frammistöðu undir erfiðum og krefjandi aðstæðum.

Heilbrigðisráðherra Ögmundur Jónasson ásamt fríðu föruneyti kynnti sér ástandið og óhætt er að fullyrða að allir þeir sem mættu þarna í dag hafi verið verulega áhyggjufullir þegar þeir sáu hversu grafalvarlegt ástandið er. Takið eftir birtunni í kringum tannlæknana á myndinni...

Tannlæknafélag Íslands og Tannlæknadeild Háskóla Íslands munu nú á laugardaginn, 18. apríl, bjóða barnafjölskyldum sem búa við kröpp kjör upp á ókeypis tannlæknaþjónustu. Þjónustan er fyrir börn og unglinga 18 ára og yngri og verður veitt milli kl. 10:00 og 13:00 í húsnæði Tannlæknadeildar Háskóla Íslands, Læknagarði, að Vatnsmýrarvegi 16. Tannlæknar buðu fyrst upp á þessa þjónustu laugardaginn 4. apríl og alls komu yfir 30 börn og unglingar í skoðun.

Fjárhagslegar aðstæður margra heimila hafa breyst til hins verra á undanförnum mánuðum og því viðbúið að mörg heimili neyðist til að spara við sig þegar kemur að tannviðgerðum og eftirliti hjá börnum. Þá er tannheilsa íslenskra barna sú versta á Norðurlöndum og íslensk börn eru að meðaltali með tvöfalt fleiri skemmdar tennur en börn á hinum Norðurlöndunum.

Því hafa tannlæknar ákveðið að koma til móts við þau heimili sem erfiðast eiga uppdráttar með sjálfboðavinnu við skoðun og viðgerðir tanna hjá börnum og unglingum. Ekki er tekið við tímapöntunum en ráðstafanir eru gerðar til þess að biðtími verði ávallt hóflegur. Nánari upplýsingar eru veittar hjá Tannlæknadeild Háskóla Íslands í síma 525-4850.

Reykjavík 16. apríl 2009.
Nánari upplýsingar:
Ingibjörg S. Benediktsdóttir, formaður Tannlæknafélags Íslands í síma 896-1547.

Féttatilkynning frá Hjálparvakt tannlækna

Formaður Tannlæknafélags Íslands þakkar tannlæknum frábærar viðtökur.

Hjálparvakt tannlækna ( doc, 24 kb )

Hjálparvakt Tannlæknafélags Íslands og Tannlæknadeildar Háskóla Íslands tekur til starfa n.k. laugardag. Nánari upplýsingar með því að smella á krækjuna.

Hjálparvaktin 2009 ( pdf, 764 kb )

Það eru fleiri en tannlæknar sem reyna að kenna ungviðinu að nota tannþráð. Hér kemur bráðskemmtilegt myndband úr dýraríkinu :-)

Tannlæknar og etv fleiri muna glöggt eftir auglýsingastríði og yfirboðum stjórnmálaflokkana fyrir kosningarnar 2007. Var ekki laust við að tannlæknar væru farnir að trúa því að loksins færu þeir tímar í hönd að tennurnar yrðu nú taldar með öðrum líkamspörtum þegar kæmi að heilsugæslunni. Eftir kosningar gufuðu þessi loforð upp eins hratt og hagnaður bankanna! Hér er smá sýnishorn af þessum mjög svo 2007 auglýsingum. Endilega sendið okkur fleiri svona auglýsingar ef þið finnið.

Ingibjörg S. Benediktsdóttir